Mʉ mvə̀ʼnə̀ bʉ̀ʉ Yambà à yèto

Bʉ̀ Yambà wèeŋ dʉkgə̀ də wo à tesə mà Kìmì(Bànkìm nə̀ ŋgaʼa nèʼe) nə nàʼa nze Àdamàwa mʉ Cameroon. Bʉ̀ʉ sə̀ mantombì pweʼ dzəm də a zìnə də bʉ̀ Yambà wèŋ à tesə mà Kìmì anə. Wo sə cèp ŋgaʼa mvweʼ lak yàʼsə ncèep Tikari. Bʉ̀ Tikari sə dʉkgə̀ sə̀ʼ vɛʼnə də bʉ̀ Yambàa bwetɛ̀ʼ awo. Bwìiŋ tsòhogə̀ maŋgəŋgèŋ də bʉ̀ Yamba à tesə lə̀sə kok mà Kìmì anə wo ŋga bòop bʉ̀ʉ mok co bʉ̀ Nzok, BiKòm, Bum nə ye mok wèŋ sə̀ wo à nə meʼrə to nto wo njo nə̀ wo à sə ca Bàʼrə̀ wèŋ ŋga Uthman Dan Fodio sə fis dzèʼ nə lap ŋgò lə̀sə ŋgwì bʉ̀ lak pweʼ. Bʉ̀ Yambà sə dʉkgə̀ də buk lak awo sə 17 yàʼa anə ye to yàʼa gwìibwìŋ co mvə̀ʼnə̀ bʉ̀ Yambà sə ŋgaʼa yèʼe fana Bàʼrə koho lo wes wo. Wo à sə cèp ncèep lak sə̀ʼ zəzok. A zìnə də bʉ̀ʉ sə à və̀ zəzok. Bòp nə̀ fò pweʼ kə cum mvweʼ bùʼrə̀ nə̀ nje nə sə cep nsàp nje mweè zok. (Scruggs (1980:3).

Ŋgò lò mantombì, səsə co bʉ̀ Mbʉəm à kə̀ dzèŋ to mvweʼ nze bʉ̀ Yambà nə wo. Wo à bɛʼ gɛsə bʉ̀ʉ mok mvweʼ cù nze nə ŋkuŋ nə cum. Bòop bʉ̀ʉ mok sə à və̀ə nə tseʼ ŋgəʼ mandzə̀ nə ye mvweʼ sə̀ wo à kə cu sə bohò bʉ̀ʉ mok sə̀ zok sə̀ʼ. Bòop bʉ̀ʉ mok à jàm lò kɛʼ mvweʼ sə̀sap co mʉ nzù bə ndzə Bìè wèŋ ŋkuŋ nə sə kə cum mvweʼ sə̀ wo cu ŋgaʼa yèʼe. Bʉ̀ Mbʉəm, Gamfè Gwèmbʉə, Ròm nə ye bʉ̀ Gom wèŋ a cà kok mà Ntem. Bʉ̀ Ngùŋ, Sè, Mveŋ,Bom nə ye Kwak wèŋ à gì kɛʼ bòŋ ŋkuŋ nə kə cum mvweʼ sə̀ wo cu ŋgaʼa yèʼe. Bʉ̀ Ntoŋ, Sàm, Nyaŋ nə ye Ntim wèŋ à cà ma ndzə Bìè. Wo tseʼ njə̀jàŋ awo ma nàʼə.

Bʉ̀ Sàm wèŋ tseʼ ghaʼ njə̀jàŋ awo ma ndzə Bìè. Bʉ̀ʉ mok co bʉ̀ Gamfè, Jàto, Nkiŋ wèŋ à cu mam yàwo ma sə Mboʼò mok bʉʉŋ lo bʉ̀ Bìè kè Tikari àlɛʼ. Ncèep bʉ̀ Bìè bə bʉ̀ Tikari wèŋ à ni və̀ sənə ncèep lak yàwo sə.

Bwìiŋ tsohogə̀ də bʉ̀ Yambà à kə̀ lʉ̀ mʉtsətsəʼrə wo sə̀ʼ. Bʉ̀ Mbʉəm à ghak kɛʼ lak mok co Ŋwà, Mvweŋ, Gom, Gamfè, Ròm nə ye Ntʉəm. Bʉ̀ Gòm wèŋ à tseʼ tətɛsə̀ bohò bʉ̀ ŋgùŋ ŋgò lʉ̀ bʉ̀ Mbʉəm sə. Bʉ̀ Mbʉəm à gbʉ̀ lə̀m bʉsə̀ wo à ka bèʼlə̀ yumok mvweʼ lak sə̀ wo à ghaʼ yàʼ bə dzèʼ sə gʉ noŋsə fana lak sə tə malì bə tu awo. Dzèʼe mok à ye kɛʼ mvweʼ nze nə co bʉ̀ Ŋgùŋ bə Ntoŋ, Ŋgùŋ bə Lus wèŋ. (Talah, 2018)

Would you like to share what this Scripture taught you today?

Your encouragement is valuable to us

Your stories help make websites like this possible.